تغــــــــــــيــر

وحـشتونى اوى بس بصراحه انا انهارده مش جايه اتكلم

انا انهارده جيت عشان مبسوطه

وقريبا جدا هقولكم انا مبسوطه ليه

عشان طبعا مش هخبى عليكم حاجه

من انهــــارده

حـــيــــاتى هتـتــغيـــر

ربـــنــا يـــســتــر

غيرت حياتى

كــل شيء معـكـ … أريده ان يتسعِ و يكبـر حــبــكِـ ، ، … حنـانـكـ ، ، خوفـكـ عليِّ، ، إِلاّ حضنكـ ، ، ، أريـــده أنـ يخنـــقــني.. ♥♥

هفضل لوحدى !!!؟

كم حلمت أن أجد شخصا يفهمني ويهتم لمشاعري ....
ويسمع كلامي...ويشاركني بصمتي....
ويقف جانبي بأحزاني....
لا لأجل شي بل لأنه يحبني وتبقى الأحلام " أحلام"

احساس الوحده

اصعب حاجه فى الدنيا انك تحس انك لوحدك
حتى لو كل الناس حواليك حتى لو اللى حواليك دول ناس بتحبهم اوى وواثق انهم بيحبوك
بس اوقات بحس ان حتى الناس اللى بيحبونى لا مش هو ده الحب اللى انا عوزاه
الحب اللى عوزاه حب حبيب لحبيبتو مش حب اصحاب او اخوات او اصدقاء
كل مره بقول انى مش هفقد الامل وان على يقين ان ربنا مخبيلى حاجه حلوه لسه معرفهاش
لكن خلاص كل يوم عن يوم بحس بأحباط وبحس انى هفضل عايشه لوحدى
دلوقتى كل حد قريب منى بقالو حياتو الخاصه
اختى وربنا يخليلها خطيبها ويهديهم لبعض يارب
ووالدتى طبعا مشغوله بشغل البيت
وندى صحبتى كليتها ومذاكرتها وحياتها مبقتش معايا
وهدى صحبتى التانيه شغلها واصحاب تانين ليها
بس انا برغم انى ممكن تكون فى حاجات بتشغلنى الا انى حاسه انى لوحدى
مش عارفه هل ده احساس لفقدان الانسان اللى كنت بحبو
ولا لفقدان احساسى بالحب نفسو
والله انا مبقتش عارفه حتى مبقتش عاوزه اكتب قى المدونه حاجه بس انهارده صحيت لقيت نفسى مخنوقه
وعاوزه اتكلم وحلمت حلم غريب يمكن ده السبب فى كلامى
حلمت بالانسان اللى كنت مرتبطه بيه مع انى والله مبقتش افكر فيه نهائى بس مش عارفه ليه
حاسه انى مخنوقه نفسى بجد وبتمنى من ربنا انو يمحيه من دماغى
ويمحى الفتره اللى عشتها معاه من ذاكرتى
نفسى بجد وبدعى ربنا يعضونى بأنسان
يحتوينى ومش بس يكون حبيب يكون ليا اخ وصديق واب
واب دى قبل اى حاجه لانى بجد وحشنى اوى احساس الابوه الله يرحم يا بابا
نفسى اوى فى الاحتواء ده نفسى ابقى حاسه امان بأنسان كويس يراعى ربنا فيا
ويتعامل معايا مش على انى واحده عارفها وخلاص او وقت وهيضيعو لا يعاملنى على انى واحده من اهلو
عشان كل ما يفتكر انى حد من اهلو اكيد مش هيقدر يعملى حاجه وحشه
يارب حققلى اللى انا عوزاه
عشان بجد خلاص انا
تعبت

حياه جديده

اصبحت لا افكر فيك
والان
ابدأ حياه جديده
بدونك

احاسيس

هو في عيني ( يساوي ) كل رجال الارض
।
।
।
।
।
।
।
احتاجك حتى ( الموت)
।
।
।
।
।
।
।
।
لا احد ينقبض قلبه خوفا عليك (كما ينبض قلبى) فكن بخير /لاجلى
।
।
।
।
।
।
।
।
।
الحـــب ينام ولا يمـــوت
।
।
।
।
।
।
।
।
।
।
خلقت لعباده ( الله) ثم لك / ولاجلك
।
।
।
।
।
।
।
।
।
।
كنت ومازلت أّجمــّل اقــّدار
।
।
।
।
।
।
।
।
।
।
।
والان احسك تشعر بى
احبك ولكن.... مر الوقت لرجوعك
سأبقى وحــــدى
دون احـــد

شيئ داخلى

البعد احيانا لايؤلم ولكن المؤلم ان يبتعد عنك شخص قلت لة يوما ان البعد هو الشيئ الوحيد الذي يكسرك

كل اللى بتمناه

عامل المرأة كما تحب هى

-----------------------------

عندما تمشى مبتعدة عنك ❤إلحق بها❤َ
............
...عندما تنظر إلى شفاهك ❤ قبلها ❤َ

...

عندما تدفعك أو تضربك ❤ امسك بها ولا تتركها ❤َ

عندما تطيل لسانها عليك ❤ قبلها وقل لها انك تحبها ❤َ

عندما تكون صامته ❤ اسألها ما المشكلة❤َ

عندما تتجاهلك ❤ أعطها اهتمامك الكامل❤َ

عندما تريد الابتعاد عنك قليلاً ❤ لاتوافقها الرأي ❤َ

عندما تراها في أسوأ حالاتها ❤ قل لها أنها جميلة ❤َ

عندما تراها تبكي ❤ أحضنها ولا تقل شيئاً ❤َ

عندما تكون خائفة ❤ أحميها ❤َ

عندما تضع رأسها على كتفك ❤ أمل راسها قليلا وقبلها ❤َ

عندما تأخذ منك شيئاً عزيزا ❤ دعها تأخذه فلن يكون أعز منها ❤َ

عندما لاتجيب الهاتف لفترات طويلة ❤ أكد لها أن كل شئ على مايرام❤َ

عندما تشك بك ❤ انسحب قليلا لتعطيها وقتا للتفكير❤َ

عندما تقول أنك تعجبها ❤ فهي حقا تكن لك مشاعر اكبر مما قالت ❤َ

عندما تمسك يديك ❤ أمسك يديها وداعب أصابعها ❤َ

عندما تقول لك سرا ❤ أحتفظ به ولا تخبر به أحداً❤َ

عندما تنظر إلى عينيك ❤ لاتلتفت حتى تلتفت هي❤َ

عندما تفتقدك ❤ فهي تتألم من الداخل ❤َ

عندما تحطم قلبها ❤ الألم لن يزول بل سيستمر ❤َ

عندما تقول أن العلاقة انتهت ❤ فهي لازالت تريدك ❤َ

عندما ترسل لك هذه الرسالة ❤ فهي تريدك أن تقرأها ❤َ

أبق على خط التليفون معها ❤حتى لو لم تقل شيئا❤َ

عندما تغضب ❤احضنها بقوة ولا تتركها❤َ

أتصل بها في أول ساعة من يوم ميلادها ❤وقل لها أنك تحبها❤َ

عاملها كأنها ❤كل شئ مهم لك في الحياة❤َ

ابق معها طوال الليل ❤عندما تكون مريضة❤َ

شاهد معها فيلمها المفضل أو برنامجها المفضل ❤حتى لو كنت تعتقد انه غبي❤َ

عندما تحس بالملل أو متضايقة ❤اخرج معها واجعلها تتسلى❤َ

هذا هو الحب الحقيقي على الاقل فى نظر المراة

كن هذا الرجل تجد الحب الحقيقى

فرحه قلبى

اولا كده عاوزه اقول انى مبسوووووووووووووووووووووووووووووطه اوى
بجد حاسه ان فى حاجه اتغيرت فى حياتى
حاسه ان الفرحه دخلت قلبى بجد
ومش قلبى انا لوحدى قلب ماما وقلب اختى وقلب تيته وقلب كل حد قريب مننا
فرحتى انهارده متتوصفش يمكن عشان انا بحب عيلى اوى وبحب دايما اشوفهم فرحانين
او يمكن عشان من بعد وفاه بابا مفيش حاجه فرحه امى بجد من قلبها
بس انهارده يوم غير اى يوم وفرحه غير اى فرحه
انهارده اختى اتقرت فتحتها على الانسان اللى هى حبته
فرحتى انهارده غير اى فرحه فى حياتى
فرحتى بأختى انها حاجه نفسها فيها اتحققت وفرحتى بخطيب اختى
الانسان اللى بجد حاسه انه اخويا من لحمى ودمى
وكل اللى بتمناه من ربنا ان ربنا يدوم الفرحه دى ويسعدهم يارب واشوفهم احلى عرايس فى الدنيا
ويفرح كل ام بأولادها يارب
واخيرا حلمى هيتحقق
واقول انا راحه عند اختى وانا جايه من عند اختى
وبعدها بشويه اقول يلهووووى ابن اختى قارفها وتاعبها
واقعد اضربوا بقى واكل منو الحلويات بقى
ياااااه على ده احساس ان شاء الله يتحقق يارب ويسعدهم يارب ويفرحهم

نسيانك صعب اكيد

أقف خلف ستارى الذى أسدلته على حبك
أرقبك من ورائه
لا أجرؤ على اشاحته والاقتراب أكثر
فتحرقنى أقدارنا
ولا أجسر أن أجعل من هذا الستار
...جدارا يعزلنى تماما عنك .....

أعلم أنك لن تكون لى
وأننى لن أكون لك
لكننى
لا أملك السلطان على قلبى
حتى أمنعه من حبك
ولا أملك تلك القوة الخارقة
التى تسجن عقلى خلف جدارا
يمنعه من التفكير فيك

انما
ما تبقى لى من الارادة
يدفعنى أن أسيطر على
ما تبقى من نفسى
فيسمح لى بأن أترقبك
من خلف ستار ....فقط ستار

لعل سنوات العمر تنزل الغمام على الستار نفسه
فلا أتطلع الى ما خلفه
ولا حتى أتمكن من رؤيته
فلعل قلبى يستسلم يوما للقدر
فيرحمنى ويتعلم
كيف يطوى حبك بداخله




ولكن كل ما اتمناه فقط هو .....
اتمنى من الله ليس كثيرا بل هو صعبا
اريد بشريا / رومانسيا
يحبنى/ يحسنى/ يشعرنى
اريد ان يجثو على ركبته اليسرى ويفتح علبه مخمليه
ويفاجئنى بلوحه اعلانيه مضيئه كتب عليها لاجلى
احبك - احتاجك - تزوجى بى
وليس اكثر من ذلك
بل هو اصعب مما تتخيلون

حيالله حكايه منسيه

اولا كده سلام عليكم
اخباركم ايه يارب يكون الكل بخير والناس كلها تكون على الاقل راضيه عن التغيير اللى بيحصل
وربنا مع اخواتنا المصريين واللبيين فى الجماهيريه ويعينهم على ما بلاهم ( القذافى )
المهم طبعا فى ناس ممكن تكون فاكره البوست بتاعى بتاع برج العقرب
وقولت انهم عندهم شيزوفرنيا وبرج معقد وانا بكرهه والكلام ده كلو
ومن سوء حظى النحس انى مبقعش غير فى برج العقرب وبصراحه كده
خطيبى الى فات ده كان من برج العقرب
ودلوقتى بيطلعو عليا من ناحيه الشيزوفرنيا فاهو عندو شيزوفونيات مش واحده بس
يعنى مثلا ايه عارفين اغنيه اروى بتاعه حاسس بيا؟
فيها كوبليه بيقول ايه بقى
بتعذبنى؟ طيب ما تقولى اننا مش ليك ولا انا ليك؟
انت عاوزنى ولا سايبنى اتعلق بيك وتاعبى راضيك .....!
الاغنيه دى يا جماعه انا بغنيها يوميا تحس انها بقيت عندى بدل صباح الخير اصحى من النوم اغنيها
ليه بقى
عشان اسم الله عليه خطيبى اللى اتحول فجأه ده اللى قريتو عنه البوست اللى فات
التحول اصبح عنده شيئ عادى
يكلمنى ونبقى كويسين وتبقى الحياه فل الفل ونهزر ونضحك ونرخم على بعض
وفى نهايه المكالمه ( متفتكريش ان فى حاجه اتغيرت احنا لسه زى ما احنا )
يعنى من الاخر احنا سايبين بعض زى ما احنا بس تقريبا بيحاول يرفع من روحى المعناويه
ويوم ما اكلموا الاقى ويتنج زياده عن نص ساعه وده على غير العاده
وابعتلوا مسج اقولو انسحب من حياتى
يقولى انسحب ليه انتى مش هتعرفى تنسينى وبعدين انا عاوز افضل معلقك بيا
ويصحى تانى يوم ولا اكن قال حاجه يتكلم بطريقه زى الزفت سورى يعنى
لا حول ولا قوه الا بالله
والله بقيت احس ان جاله زهايمر
ونبى لو حد دكتور او بيفهم فى الامراض النفسيه دى يقولى
الا ممكن الواد يكون جالو مرض معدى ولا حاجه وانا مش ناقصه
والمشرحه مش ناقصه قتله
وكان الله بالسر عليم
استودعكم الله
واشوفكم على خير لو لسه ليا عمر(هى الواحده بعد ما تكون على علاقه بـ شريف هيكون فيها الروح) ربنا يستر

صدمه & احتفال

طبعا ناس كتير هتستغرب لعنوان البوست
بس ان جيتو للحق انا كمان مستغرباله اوى او يمكن عشان لحد دلوقتى مش فهماه
طبعا الفتره اللى فاتت دى مرينا بأحداث كتيره غريبه ومؤسفه
بس الحمد لله ما داقت الا ما فرجت
مش هكدب واقول انى مش مبسوطه بالتغير ده لا بالعكس مبسوطه
ويارب يكون كل شيئ كويس وكل حاجه تتصلح ويجى تعب شهدائنا بفايده ان شاء الله فى الجنه ونعيمها
نيجى بقى للبوست طبعا انا عارفه ان فى ناس عاوزه تعرف ايه هى الصدمه
وايه هو الاحتفال
الصدمه
نيجى مبدائيا للصدمه طبعا ناس كتير كانت متابعه المدونه وعرفت انى المفروض كنت هتخطب اخر شهر 1
بس للاسف ويمكن اكبر صدمه فى حياتى هو
اختفاء هذا الشخص ( الخطيب )
مش اختفى على انه شبح يعنى لا
بس حصلتلته تغيرات فسيلوجيه وكربهويتريهيه ( ايه الكلام العجيب اللى انا مش فهماه ده )
المهم ماعلينا اتغير 6800 درجه من الملاك الى اللهم احفظنا شيطان
بقيت حاسه انى بتعامل مع حد معرفوش حد محبتوش حد معشتش معاه ايام سعاده زى ما كنت موهومه
واللى هيسألنى يقولى ايه السبب
هقوله ولا اعررررررف ( حاسه انى بطيخه ولا فاهمه حاجه )
ليه وازاى وعشان ايه ( والله مش اعرف )
ونقفل بقى الموضوع عشان مش عاوزه اتكلم اكتر من كده


نيجى بقى لموضوع
الاحتفال
طبعا من زمان اوى يجى من 3 سنين كده محتفلتش بالفلانتين
ليه بقى
طبعا اللى هيقولى ايه معندكوش محلات هدايا ولا محدش كان بيعبرك
وهتتريقو بقى
هقولكو اه محدش كان بيعبرنى مش عشان انا يعنى واقعه كده
لا بس عشان انا مكنتش بحس بالفلانتين غير مع شخص واحد وهو ( اسلام )
ده كان اول حب فى حياتى وبرغم انى ارتبط بعده
بس محستش بطعم عيد الحب الا معاه سبحان الله ومش عارفه ليه مع انى حبيت بعده
ولما جيت السنه دى وقولت هيبقى فيه اختلاف جزرى فى حياتى وهحتفل بالفلانتين مع انسان بحبو
وكمان هتخطبلو والنحس هيتفك ( واغيظ المعنسين ) ادينى اعده جنبهم اللهم لا شماته
وكمان عشان وحشنى اوى احساس انى اجيب هدايا لحد او يتجبلى ورد ولا دبدوب احمر والكلام ده
وطبعا الحلو ميكملش الا ............
1 : مصر كلها رفضت الفلانتين وقامت ثوره والناس كلها استكتروا عليا الفلانتين السنه دى
2 : الاخ المنتظر تغير وليس ادرى ما تغير به ( حلوه ما تغير به دى )
3 : ودى الاهم ان مولد النبى جاى مع الفلانتين فا طبعا قررت ومصر كلها قررت ان محدش يحتفل بالفلانطين ده
وكلنا نقضى اليوم ده سوا مع اهلينا فى البيت ومع حلاوه المولد
واكيد حلاوه المولد احلى من اى فلانطين او دبدوب او بوكيه ورد والكلام الفاضى ده
ومش هقولكم هابى فلانطين اقصد فلانتين
لا هقولكم كل سنه وانتم طيبين ومولد نبى سعيد علينا كلنا عليه افضل الصلاه والسلام

رد الجميل

ليـــك بعد الرحيـــل .. تعظيــم سلام ليـــك يا زعيـــم .. من قلــب كل مصــرى اصيــل .. بنقــولك متزعلــشى .. تفووت ايام قد ما تفوت .. و لو حتى بعد المووت .. فى بالنا دايما و مش هتموت .. هندعيلك ماتقلقشى .. ( مسامحك ) ( مسامحك ) ( مسامحك ) انا و اللى زيى .. اللى فاهمين معنى ان .. يودعك رئيس بلدى ياغالى يا رمز لينا يا كبير .. ما انت مش ملاك و لا معصوم .. و لو الدنيا عليك بتقوم .. وقفك اكيد مفهوم .. و نشوف وشك بكل خير

جمـــعه رد الجــــميل .. 18-2-2011 .. لم و لن ننســـاك سيدى الرئـــيس .. اطال الله فى عمرك يا مبارك الحرب و الســلام

هفضل بحبك مهما يحصل

رجل لم يكن له مثيل على مر العصور
معنديش اى كلام اقوله غير متسبناش يا مبارك
البلد هتولع
احنا بس كنا عاوزين شويه تغيرات واهوه بيحصل
بس انك انت تمشى
لا لا ومش هسمح لاى حد عاوزك تمشى
مش هسمح ان بلدى تنهار
مش هتسمح اننا نبقى مثل للعراق وفلسطين ولبنان
مس هسمح ان الخير يروح منها
بحبك يا مبارك

يا دبله الخطوبه (عقبالكو كلكو ) وانا سبقتكوووو

طيب اقولكم بقى ازيكم ازيكم
انا جايه ارخم عندكم
عاملين ايه وايه الاخبار يارب يكون كل شيئ على ما يرام ( ما يرام ايه كبير اوى الكلام ده)
المهم اشطه يارب الكل يكون كويس ولوز الجوز
ندخل بقى فى الموضوع
طبعا زى ما قولت قبل كده انى لو متخطبتش قبل السن ال 21 هيحصلى حاجه

وممكن الموضوع يكبر واضرب عن الجواز
بس الحمد لله شكلها هتحلو وربنا سهلها واخيــــــرا وبعد طــــــول انتظــــار
انـــــــــــــــــــــــا (اعوذ بالله من كلمه انا)
هتخطـــــــــــــــــــــــــــــــــــــــب
والنحس هيتفك والحمد لله
وباقى من الزمن 15 يومـــــــــا
وهبقى زى البنوتات الحلوين المخطوبين ومش المعنسين ( مش تزعلو منى بقى )
وهبقى مرتبطه بــ شريـــف رسمــــــــــــــــــــــى
ورسمــــــــــى دى كانت تهمه قبل ما تهمنى وكل اللى هقوله دلوقتى
ان ربنا يخليه ليا ومش يحرمنى منه ابدا
لانى مفتكرش انى لو كنت اعد عمرى كلو عشان الاقى واحد زيه مكنتش هلاقى
(قل اعوذ برب الفلق)
ونبى حد يناولنى خرزه زرقاا
سورى وكته بقى انتو عارفين العين فلقت الحجر
وعقبال عندكم يا حبــــــــــايـــــب ( انا مالى قلبت على تيته الحجه كده ليه !!)
لا بجد عقبال كل البناااااانيت يجيلهم نصيبهم ان شاء الله
i'm SoOoOoOoOoOoOo HaPpYyYyYyYyYyY
SHeRiF & NaiRa
For Ever

مات احمد ومات مينا

احمد ابن فاطمة..
ومينا ابن جاكلين..
صحاب من سنين وسنين..
جيران ودايما مع بعض..
واكلين شاربين..
ساعات زعلانين..
بس أكتر فرحانين!
بيذاكروا سوا...
ويروحوا المدرسة سوا..
ويامه إتخانقوا..
بس بسرعة..
يرجعوا يلعبوا مع بعض
تاني مشتاقين..!
فاطمة وجاكلين برضو صحاب...
دي صحبية عمر مش من أيام..
جاكلين أول من رشت الملح فالجامع..
يوم كتب كتاب فاطمة...
وفاطمة أول زغروطة فالكنيسة..
وقت إكليل جاكلين..!
وطول رمضان..
صواني طالعة نازلة
مع إن مينا وجاكلين..
ماكنوش زيهم صايمين..!
جيران وصحاب..
يارب إحفظهم..
بقوا أغلى من الأهل..
طبعا مهم عشرة سنين...!
بتمر الأيام بسرعة..
كبر أحمد ومينا..
كبروا بقوا رجالة...
وقلب جاكلين وفاطمة..
فرحان سعيد.. بنفس الحالة!
قالوا النهاردة الجمعة..
هنودع 2010..!
وزي ما أتعودوا..زي ما أتربوا
يستقبلوا السنة الجديدة ..
وهم لله بيصلوا..!
أحمد يصلي في المسجد
ومينا يحضر القداس..
وبعدها يرجعوا ع البيت
وسوا يحتفلوا..!
وفي البيت جاكلين وفاطمة..
في إنتظار الغالين
وبفرحة وضحكة صافية..
مستنين الـ11 تزين الألفين..!
الكنيسة قصاد المسجد..
والاتنين جنب البيت..
دخل أحمد ومينا.. الكل لدينه حافظ
وهي دقيقة واحـدة..
وسمعوا إنفجار جامد..!
صرخت جاكلين...
باسم الرب..باسم الصليب..!!
وفاطمة ترد..
سلام قول..من رب رحيم..!!
فين الولاد...؟؟؟
فين ضي العين؟!!
مات أحمد..
مات مينا..
مات فـ المسجد..
مات فـ القداس..!
إصل الإنفجار.. مالوش دين
مافرقش بين الناس؟!!
مات مينا..
وقلب جاكلين إتحسر..
وبموت أحمد..
قلب فاطمة إنكسر..!
في شرع مين..
تموت الشباب؟؟!!
في ملة مين..
نتحرم من الأحباب؟!!
لا شرع ولا ملة..
ولا حتى عرف..
يقول إن خلاص البشر..
بقى من فطرتهم العنف..!!!
دم ولادهم سال..
وأملهم فيهم مات..!
والناس تقول..
مسلم قتل مسيحي
لا مسيحي قتل مسلم...
ونسيوا اننا جوا مصر..
كلنـا أقبـاط..!!.
كلنا مسلمين
من أقوال أشرف الخلق سيدنا محمد
صلى الله عليه وسلم:

(من آذى ذِمِّياً فأنا خصمه..
ومن كنت خصمه خصمته يوم القيامة)..
صدق رسول الله..
عليه الصلاة والسلام

منقــــــــــــــــــــــول

هنفضل واحد (حسبى الله ونعم الوكيل)

ليه كده ليه بيعملوا كده
هما فاكرين بتفجير كنيسه ولا جامع ولا موت مسيحى او مسلم كده خلاص المسيحين اوالمسلمين خلصوا من البلد
او كده خلاص اتفرقنا عن بعض وهنبقى حرب مسلمين على اقباط
لا لا لا والف لا مش انتو اللى هتعملوا فينا كده احنا مصريين
لو مش عارفين يعنى ايه مصريين نقول مصريين يعنى اه يعنى قلب واحد
خوف واحد
دم واحد
عيشه واحده
واكل وشرب واحد
يعنى ولا الف ارهابى حقير يقدر يفرق اخوات عن بعض
احنا دمنا بيجرى فى عروق بعض احنا روح واحده كنيسه وجامع
شيخ وقديس واحد
انجيل وقران واحد
ولينا رب اسموا الكريم بردو رب واحد
!
!
!

مشهد واحد : شاب مسلم ذهب الى صديقه المسيحى الى الكنيسه ليحتفل معه . وعندما انفجرت القنبله مات الشاب المسلم وعاش صديقه المسيحى

مشهد اتنين : شابه مسلمه ذهبت للتبرع بالدم وواللى محتاج الدم شاب مسيحى . وصدفه كان احد افراد عائله الشاب يقف بجواره......ا . ولم يعرف ديانتها الا عندما كتبت اسمها . وابتسم

ده مش من ايام سعد زغلول ولا جمال عبد الناصر . ده حصل النهارده
الارهاب مش بيفرق ولا بيختار مين بيموت . الارهاب اعمى
احنا مش العراق حتدخل ما بينا . ولا احنا السودان حتقسمنا . ولا احنا لبنان حتفرق ما
بينا حرب اهليه .عدا علينا منك كتير . وكلهم راحو . وانت حتروح

(فَلَمَّا دَخَلُواْ عَلَى يُوسُفَ آوَى إِلَيْهِ أَبَوَيْهِ وَقَالَ ادْخُلُواْ مِصْرَ إِن شَاء اللّهُ آمِنِينَ )
(وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ
صدق الله العظيم
عرفتو يعنى ايه مصريين؟
ولا نقول كمان ّّ!!!!
مسلمين & اقباط
كيـــــــــان واحد