يوم مبشر للغايه

احكيلكم بقى على اللى حصلنا انهارده انا وندى بنت الحج دراكولا ( الى حصل لا ينكتب ولا يتقرا يلهوتى )

امبارح اعده فى امان الله فى بتنا لقيت الجرس بيرن بطريقه فظيعه

ومين بقى اللى بيرن الجرس ده وبيعمل الازعاج ده طبعا مفيش غير حبيبته قلبى ( وانا جزه على سنانى ومش عاوزه افتح )

بس طبعا لانها وحشانى فا اكيد هفتح وقومت افتح الباب وطبعا كالعاده ( اخدت ندى فى حضنى لانها وحشانى حوالى ساعه الا ربع )

اولا ما دخلت قالتلى جبتلك شغل حلو
بقولها بجد فين وايه نظامه
فا دخلت سلمت على مامتى واختى ودخلنا نعد فى اوضتى نتكلم ( قصدى ننم على امه لا اله الا الله )

ودخلنا اوضتى ( الجحر بتاعنا علشان ننم براحتنا )

قالتلى السواق بتاع مامتها بيشتغل فى شركه الصبح الشركه دى

عاوزه سكرتيرات تسويق ينفع تشتغلى قولتلها اشطه نروح نشوفها

كلمت الراجل وبتاع وظبتنا اننا نروح نعمل انتر فيو انهارده

المهم خدنا العنوان فى المكان الفلانى وننزل محطه مترو كذا وانا هستناكو قولتله اوكى قالتنا هستناكو الساعه 12

ندى سمعت كلمه 12 وحسيت انها عايزه تقولى ( يا بنت الترابتيييييييييييييييت 12 مين ده انا بنام 12 )

روحت طبعا لحقتها قبل ما تقول اى حاجه ندى حبيبتى وصاحبه عمرى

هتروح معايا بكره لان دى الصداقه انك توقفى جنب صحبتك

ندى وبين عنيها نظره ( بتبصلى بقرف طبعا )

المهم اعدنا مع بعض براحتنا وبعدين النور قطع فى سرى طبعا ( حبيبتى يا نودى يا وشك )

وطبعا هى خلعت وقالتلى انا هطلع فوق بقى ( تروح بيتهم طبعا واراهن انها طلعت علشان النور لا هى طلعت تاكل كالعاده )

مشيت ندى وانا اعدت شويه طبعا لانى مش ينفع انام من غير ما اكلم حبيبى ( عبده )

المهم اعدت احب فى التليفون للساعه 4 ونص وسهرت قدام التى فى للساعه 5 ونص

ودخلت نمت على اساس انى هروح الانتر فيو الساعه 12 او 1

وانا فى عز نومى الساعه 6.30 لقيت الموبيل بيرن رنه ميييييييييين؟ ( رنه حبيبتى ندى )

لقيت ان ندى بتقولى انا لسه صاحيه ولو نمت تانى مش هصحى خلى الميعاد الساعه 9

حرام عليكى يا ندى 9 ايه طيب خليها 10 انا لسه نايمه من ساعه

خلاص اوكى هصحيكى اوكى سلام وسلام

الساعه 9 الا 10 ندى يلا يا نيره قومى بقى وانا هقوم اخد دوش والبس وانزل تكونى ظبطى وخلصتى

حاضر يا ندى ( وانا اصلا عاوزه اعضها )

المهم لبست وظبط حياتى وخرجت استنى ندى قدام البيت طبعا لسه مش نزلت

دخلت الحوش عندهم وكالعاده يا ندددددددددددددددددددددددى

ردت ندى حاضر يا بت خلاص نازله ( بصوت خارق للطبيعه طبعا لانها فعلا بنت عم مصطفى قصدددددى بنت الحج دراكولا )

نزلت ندى وروحنا ركبنا المترو وطبعا فى بهدله المترو التذكره بتاعتى وقعت منى

وطالعين من المحطه بقى ( هيييييييييه وصلنا )

ادور على التذكره منين فين مش لاقيهاها

ندى عدت من المكنه وراحت تقطعلى تذكره

لقيت ظابط بيسالنى فى ايه ( وانت مال الماما والبابا بتوعك يا عم خليك فى حالك )

فى ايه يا انسه لا ابدا مفيش حاجه بس التذكره بتاعتى وقعت وهى راحه تجبلى تذكره تانيه

لا استنى وفتح المكنه علشان يفتح البتاعه دى وانا اعدى ( تصدق شكلك راجل كويس )

انتو منين ؟ احنا من شبرا

اه طيب معاكى بطاقه

اه طبعا معايا طيب ممكن اشوفها هههههه حاضر ( متقلقش مش مسجله )

اه طيب انا دلوقتى المفروض اعملك محضر .... نعم محضر ليه ان شاء الله ( يا ابن التييييييييييت )

لان لازم تدفعى غرامه .... غرامه ليه هو انا نطيت من فوق المكنه

انا كنت هقطع تذكره تانيه بفلوسى ( ابتسامه عريضه مع رفعه حاجب بسيطه)

مينفعش لانها مش مختومه ( طيب والعمل يا حلو اخواتك )

انا هاخد صوره من بطاقتك لحد ما تجيبى الغرامه ( يخويا ولا تاخد البطاقه كلها )

نزلنا علشان نروح الشركه

وبصراحه هو كل يوم مبشر للغايه

( بس الحمد لله اشتغلنا )